اوزاق یول
قاشقایی دیلی و ادبیاتی  
قالب وبلاگ
یولداشلار باغلانتی سی
چت باکس


بو آدرس ده منیم  دانیشیغیمی رادیو /یاسوجونان/ ائشیدینگ

http://www.uplooder.net/cgi-bin/dl.cgi?key=87f6b9d82668a0b73b62825cd85bbc75

آغیر ائل برناماسی/ حورمتلی دوستوموز نوذر استوار ایجراسی نان

 

[ یکشنبه دوم آذر 1393 ] [ 8:56 ] [ _ ارسلان میرزایی ]

سون مکتوب

بوناما سون مکتوبوم دور

و بو قوشما آخیرکی یازما دیر سنه

نه سه‌ومکدن بیر سؤزوم وار

نه آغیزیمدا دیلیم واردیر

نه بیر ایشارا آنگلایان

گچمیش گونلر:

آدینگ بولاغیندان آندلار ایچیردیم

قاشلارینگ قافیندان قورآن اوخوردوم

اوزونگ قیبله‌سینده نامازیم اولمازدی قضا

اووجونگ یواناغی ا‌ه‌‌ویم دیرلیگیم

آما ایندی:

نه یالواردام نه یاخاردام

نه ساچلارینگ هؤروموندان گؤی قوشما مونجوغو آسدام

نه من مجنون فرهاد اولدام

نه سن شیرین لئیلی تکین

نه من گؤرمه‌گینگه حسرت

نه ده اونوم دالیمدادیر

گئدیرم بو اوزاق یولو

بو گئدیش سونکو گئدمگ دیر

گچمیش گونلر تکین بودا گلر گچر

گئدن قیش تک

اوزو قره کؤمور قالیر...

[ دوشنبه سی ام تیر 1393 ] [ 9:18 ] [ _ ارسلان میرزایی ]

هاردایانگ ؟

هاردایانگ سن آی وفاسیز هاردایانگ؟

سن جووغالی من یالینگیز هاردایانگ؟

گلین الینگ قالدی اؤزگه الینده

بیر دئ گؤرم ایندی من سیز هاردایانگ؟

تورک ائلینده گون آیلاردان سورموشام

دوغو، باتی، قوزایلاردان سورموشام

یاکوتلاردان آلتایلاردان سورموشام

استانبولدا، اوروم، تبریز هاردایانگ؟

آینایا باخ اوزونگو گؤر اؤزونگده

هر نه یاخچی یامان واردیر اؤزونگده

کور اوغلونونگ هیبتی وار اوزونگده

قاشی تیمور گؤزو چینگیز هاردایانگ؟

گل ای منیم اورگیمی قوپاردان

دیندیر منه او سیتاردان او تاردان

هانی ائلدن هانی بویدان تباردان

تورکمنه‌نگ، قازاق، قیرقیز هاردایانگ؟

ملک یازار قره مکتوب چینیمده

بیلمم سن سیز نه یازغی وار اونومده

ایشیق گتیر منیم قره گونومده

هیلال قاشلیم اوزو گوندوز هاردایانگ؟

هاردایانگ سن؟ سندن سورا سولدو یاز

آیریلیقدان منه هرنه اولدو یاز

مدت دیر کی هئچنه منی جوشدورماز

داریخمیشام بعد_ ی هرگیز هاردایانگ؟

یئر قورشاغی گول اوزونگدن آلار رنگ

آسیماندان یئر اوزونه گله‌رنگ

چوخ قریبم من سنم یا سن مننگ؟

یئددی ایلده اولدو سکیز هاردایانگ؟

                              قزاقستان، تورکستان شهری92/2/14

[ چهارشنبه هفتم اسفند 1392 ] [ 10:51 ] [ _ ارسلان میرزایی ]

        قشقایی یازاری محمد هنرمند شیش به‌ی‌لی طایفاسیندان « قانون قبیله‌ی پدری» آدلی رومانینی 1389 جی ایلده یاییملاندیرمیش. بو کیتاب گرچکدن «ادبی،فرهنگی،اجتماعی، سیاسی و ...» باخیمدان بیر اوخومالی کیتاب دیر.

        «به او گفته بودم تصويري كه بعضي وقت‌ها آنسوي آينه مي‌بينم، خطري را متوجه زندگي مشتركمان نمي‌كند. گفته بودم در فرهنگ قبيله‌اي ما، اولين عشق هر دلداده‌اي با دختر دلخواهش، اين‌گونه كليد مي‌خورد...»

بستن این پنجره


نام کتاب:

قانون قبیله پدری

موضوع:

رمان فارسی

پدید آورنده

محمد هنرمند (نویسنده)،

ناشر:

نگار و نیما

تعداد صفحه:

۱۶۰

چاپ:

۱۳۸۹

شابک:


۹۷۸-۹۶۴-۲۹۷-۸۵۸-۸


[ سه شنبه سی ام مهر 1392 ] [ 12:31 ] [ _ ارسلان میرزایی ]

حیات یولداشیم ایچین

 

قشقایی گول منیم اینن یولا گل

من گئدیرم سنده استانبولا گل

بیر دامچایدیم باتمیشام آغ دنگیزه

اوز و ایزله منی بولا بولا گل

یوردو بولوب یورد داشینی سالمیشام

آغ سارای دان بوکول بیر آز سولا گل

دیلی باغلی جوجوقلاری بئله ک له

دوش بو یولا قوی هرنه سیر اولا گل

بو آیریلیق آغیر ائله چتین دیر

قویما گؤزوم بوز تورپاقدان دولا گل

آیاق یالین، باشینگ آچیق، قارنینگ آج

سو الینگده قوی یئره دوش یولا گل

گول دیلینگی گؤتور قوتار دؤگوشدن

*صولتیمز گلمز  یولدان بئله گل

* «صابا قونداگ استانبولونگ دوزونه»

گلمز گلین باشا دوواق دولا گل

اولما رضا*، آسینا*میز پوزولا

قویما گولوم قونچاسیندا سولا گل

                                                   92/2/11استانبول

....................................................................

*قشقایی ائلخانی صولت الدوله دئییرلر: رضا شاه سیتمدن قشقایی ائلینی کؤچرد تورکیه تورپاغینا...

صولت الدوله بویورار کی: ائلی آپاردیم تورپاغی نیج ائیلاییم؟!

..................................................................

قشقایی شعری:

*:صابا قونداگ استانبولونگ دوزونه         قوش آتاراگ اوردکینه قازینا

...................................................................

*: رضا و آسینا: آد


 

[ جمعه چهارم مرداد 1392 ] [ 23:18 ] [ _ ارسلان میرزایی ]
[تصویر: landscape12.jpg]

ائل نقاشی

هئچ دوربین گؤزوینن باخمادینگ ائله

گؤینونن چکمیشنگ وطن عکسینی

قویمادینگ ائلیمیز جان وئره اؤله

بزتدینگ چؤللری چیمن عکسینی

سورو گللاه گلیب بوردا سان وئریر

بور قوینونلار دانگاهلاردا دان وئریر

شوخ گؤزللر قوچ ایگیددن یان وئریر

چکمیشنگ منیژه_  بیژن عکسینی

طبیب گؤردوم یامان دردی علاجدا

دایاق توتموش ایگید گؤزو آغاجدا

آتلی چاپیر گؤروب جئیران قیقاجدا

نه چکمیشنگ ساچی خرمن عکسینی

دوگو دؤیمه‌گ هاینا هلی  چکمیشنگ

پوخوولاردا دؤنمز دلی چکمیشنگ

ائل ایچینده هر عملی چکمیشنگ

گلن، گئدن، دئیه‌ن، گولن عکسینی

ائل ایچینده گومورلانان لؤکلری

آراغاجی، توربالاری یوکلری

ده‌ییرماندا آغاراتمادیگ توکلری

جاوان کرز گؤردوم بو تن عکسینی

چکمیشنگ سن تویدا آتلی چاپانی

قیقاج ائدیب یئردن یاغلیق قاپانی

یاییق یایان سحر چؤرک یاپانی

قیزیل گومپول چادیر_ گرمن عکسینی

فرهادی چکمیشنگ شیرینی تویدا

خوسروو چکمیشنگ بیر اوجا بویدا

ایگیدی چکمیشنگ های اینان هویدا

کرم اصلی قرری همن عکسینی

سن ائلیمه جان وئرمیشنگ بیژن خان

قلیمینگ بورماق دیر رنگی قیزیل قان

اؤلمه‌ینگ سن الحق اؤلمه‌نگ هئچ زامان

گؤینوموزه چکدگ بیژن عکسینی

1391_ شیراز


[تصویر: Asare_Bijhan_Bahadori_23-wwwSh.jpg]

اوستاد اثرلرینی بوردا گؤرونگ

http://www.qashqaie.ir/showthread.php?tid=501

[ چهارشنبه چهاردهم فروردین 1392 ] [ 12:26 ] [ _ ارسلان میرزایی ]
هر قاشقایی بیر آساناک( قارری آنالاردان سوروشونگ، یازینگ و بیزه گؤندرینگ)

تئز ترپنمه‌سه‌گ چوخ گئج اولار...

اوبامیزدا بیر قارری، گؤینونونگ کوهنا چیققینی آچاندا بو آساناکلار

( بایاتی لار) ایچیندن چیخدی:

آبی دونونگ دورنگی                           یومادیم گئتدی رنگی

سن کی سه‌ودینگ آلمادینگ                 ائللرینگ نام و ننگی

 

آغ داغدان کاماه بیچدیم                        سوووق سولاردان ایچدیم

بس کی دئدیم یار گله                         آللاه گؤزوندن دوشدوم

 

آغ اوغول آی اوغول                             دوداغی قایماق اوغول

وعده‌یمیز چشمه‌ باشی                       یاتاغیمیز داغ اوغول

 

قرشی ده قره کونار                             بلگی وار بونار_  بونار

یاریم اوباسی کؤچموش                        باخ گؤرم هارا قونار

 

آغ دونونگ علم_ علم                            جیبینده داوات_ قلم

گئدنده کوسدورموشم                           گل تا گؤینونگو آلام

[ شنبه پنجم اسفند 1391 ] [ 13:25 ] [ _ ارسلان میرزایی ]


.......

 

داغلارینگ باشینا تورپاق اله‌یینگ

تؤکونگوز قلبیره سیز داغ اله‌یینگ

 

آی اوزونگ حورمتینه بیرجه سلام

زاغی گؤز ساغلیغینا زاغ اله‌یینگ

 

سویوزلار آدینا سیز سو نذر ائدینگ

سود ایچن دوداغا قه‌یماق اله‌یینگ

 

هر باشینگ باشینا بیر گول سپینگیز

هر گولونگ اوستونه بیر باغ اله‌یینگ

 

آتلارینگ نالینا بیر آی اکینگیز

خئیمه لر باشینا بایداق اله‌یینگ

 

هر یولونگ سولونو دؤندرینگ ساغا

هر ساغینگ ساغلیغینا ساغ اله‌یینگ

 

گؤزلرینگ یاشینی توزدان سیلینگیز

تئللرینگ تارینا داراق اله‌یینگ

 

آللاهینگ قانی تؤکولموش تورپاغا

بو کولونگ باشینا یارپاق اله‌یینگ

 

بو یولونگ اوجوندا جنت اه‌وی وار

بو یولونگ یولوندا باشماق اله‌یینگ

 

کربلا لئیلاسی مجنون ایسته‌یه‌ر

تؤکونگوز قلبیره مشتاق اله‌یینگ

                                              91/10/8 شیراز

[ سه شنبه دوازدهم دی 1391 ] [ 10:53 ] [ _ ارسلان میرزایی ]

هر كيم...

هر كيم ائدر بئش وقت كعبه‌يه سوجود

دم بدم عاشيقينگ قيبله‌گاهي سن

اينساندا كي ممكن اولماز بو وجود

بيلمم حورانگ يا ملكلر شاهي سن

حوسنونگ آي و گونه نه نيسبت وئرم

چيخ تا عالم گؤره نه بير من گؤرم

ييقر دستگاهيني بانو_ ي ائرم

وقتي كي بزرنگ خيمه گاهي سن

پري گره‌گ اولا نظردن نهان

حورو گوناهكارا اولماز همزبان

ملائك سنگ سؤيله نه‌دن شيرين جان

وورموشانگ يئر اوسته منزلگاهي سن

بو معني‌يه هئچ آپارماز، عقل_ ي پي

همدم اولا بير گدايا شاه_ ي كي

خوش او صحبت، خوش او ساغي، خوش او مئي

بير فينجاندا گاه من ايچم گاهي سن

عاشق اولان، خييالي نه؟ فيكري نه؟

ياردان آيري نامازي نه؟  ذيكري نه؟

يئمه‌ميش نعمتينگ “مأذون” شوكرو نه؟

ممكن اولماز يئرده بولانگ ماهي سن

[ یکشنبه نوزدهم آذر 1391 ] [ 14:16 ] [ _ ارسلان میرزایی ]

سن، يول و گؤز ياشي

اولدوزلارينگ گؤزو آيدين قرنگي شام ياناقلانير

آي اوزوندن ياغير ايشيق چؤل اتكي چيراقلانير

بودور شرطيم اورگينن گلمسه يار باهار اولماز

گؤي دورنالار قانات آچيب باشيم اوسته جاناقلانير

باغلاميش بويناغي گؤزونگ سويوب سورمه كاروانيني

قچيب گؤينوم اه‌وجيگينده قره گؤزونگ اوتاقلانير

كيپريكلريم قووشوغوندان گؤزوم باخير سنه ساري

شاملار گؤزونگ خييالي نان گئنه گؤينوم قوجاقلانير

اوزونگ قبله‌سي كارواني گچير شام چاغي گؤينومدن

اوزاق يولونگ قوباريندان آي اولدوزلار تورپاقلانير

آرالي دان گلير بير سس قولاغيم گؤزو يولدادير

باخ گؤر سان كي آغير ائل دير نه دير چؤلده دولاقلانير

يار ييغميشدير آياغيني گچه كيپريك كؤرپوسوندن

گلير گؤزلريمينگ چايي آيريليق يولو باغلانير

[ سه شنبه بیست و سوم آبان 1391 ] [ 21:55 ] [ _ ارسلان میرزایی ]
.: Weblog Themes By Iran Skin :.

درباره وبلاگ

ارسلانام 1356ایلینده
آنادان دلی دونیایا گؤز آچمیشام
بیر قاشقایی چادیریندا
بیر پری منه سؤز اؤرگتمیش
.......................
..................
.............
.........
.....
...
.