من ائله بیلیردیم سن سیز اؤله‌رم

من سن سیز اؤلمه‌دیم منی باغیشلا...

                                            «رامیز روشن» 

........................................................................................

آیریلیب گئدنده بو اوزاق یولو

دالینگچا گلمه دیم منی باغیشلا

من سنی گؤزه‌لیم گؤزلریم نورو

تانییب بیلمه دیم منی باغیشلا

 

بو یوللار گؤتوروب آپاردی سنی

آپاریب محنتدن قوتاردی سنی

اوره‌گیم چوخ گزیب آختاردی سنی

تاینگی بولمادیم منی باغیشلا

 

ترپندی دوداغینگ ملک خویونگدا

بالیق کیم توردایدینگ آستا بویونگدا

شانلیگینگ چاغیندا سنینگ تویونگدا

آغلادیم گولمه‌دیم منی باغیشلا

 

روزگار بئلمه فورصت وئرمه دی

تا عومور آلمادی عبرت وئرمه‌دی

غوروروم الیمه رخصت وئرمه‌دی

یاشینگی سیلمه‌دیم منی باغیشلا

 

آیریلیق چاغیندا دئدینگ گله رم

گلمه‌دینگ قدرینگی ایندی بیله رم

اؤزوم اؤز یانیمدا دئدیم اؤله‌رم

من سن سیز اؤلمه دیم منی باغیشلا

                                             آذر-90 شیراز

 

وئبلاک یازان _ ارسلان میرزایی - پنجشنبه یکم دی 1390 ساعت 10:42 موضوع لار | ثابت لینکيم

اوزو بوغدا

قاشلاری آی دیلیمی

تئللرینگ اوخشاماسی

                     هانی اؤلو آغیتی دیر؟

 

گؤزلرینگ توولاماسی

نئچه اوزگجی اوتوب

یا اوزونگ شانلیگینی

                    هانسی تویدان گؤتورموشنگ؟

 

دور آیاغا قاش قایی قیز

کؤرپه مللک

کیپریکلریم کؤرپوسوندان

ائن گل بو گؤزوم کوراسینا دونیایی گز

آی گونونگ دوغماغینی

گون آیینگ باتماغینی

دنگیزینگ دالغاسینی

                           ائد تاماشا

 

بئش دانا بورماق هر بیری بیر ائل منه

قاش قایی قیز

اللرینگ

ائللرینینگ

اولماغینی

کیم اؤلدورور؟

 

سن منیم مرادی مانگ

آیاق گؤتور

سن یا علی(ع)

قدمینگ گؤز اوستونه

قاش قایی قیز

کؤرپه ملک

گچ کیپریگیم کؤرپوسوندن

دون قاباغا اون آلتی ایل

سن صحرایانگ؟...

یا فاطمه (ع)؟

مرادیمانگ

                        من ارسلان_

                                          میرزایی یام

                                                          سن منیم مرادیمانگ

                                                                          قاش قایی قیز....

 

 

 

وئبلاک یازان _ ارسلان میرزایی - پنجشنبه بیست و هشتم مهر 1390 ساعت 13:33 موضوع لار | ثابت لینکيم

آدینگ گلنده شعریمه                سؤزوم چیچک ایسی وئریر

بو سؤزلری دئیه م کیمه            گؤزونگ اورک ایسی وئریر

 

آی خرمنی گونده سووور          باغریمی بوغدا کیم قووور

اوزونگده گون ایسسی چووور    شامینگ ایپک ایسی وئریر

 

سن تازا وورموشانگ باشا        من باشیم ده‌یمیشدیر داشا

گؤزومو قورد ائتدیم قاشا           بو قاش کؤپک ایسی وئریر

 

گئجه اولدوز اوتارمیشام           حسرت باشا آپارمیشام

بس کی سنه یاخارمیشام           الیم اتک ایسی وئریر

 

منی دیلر شیرین دیلینگ           منه یارلیق ائدر الینگ

من آغساغام عاصا تئلینگ         گوجلو کؤمک ایسی وئریر

 

اوغرو گؤزونگ یامانچی دیر     ساری تئلینگ تالانچی دیر

باخیشلارینگ یالانچی دیر          گؤینونگ گرچک ایسی وئریر 

 

وئبلاک یازان _ ارسلان میرزایی - شنبه نوزدهم شهریور 1390 ساعت 8:20 موضوع لار | ثابت لینکيم

بو دونیایا گلیب...

بو دونیایا گلیب گلندن بللی

ساز صحبت خوش آوازدان دویمادیم

اؤزومو  تانیییب  بیلندن بللی

خوب یولداشدان اهل_ ي رازدان دويماديم

خوش او گون كي دلبرينن روبرو

اوتوروب ائدرديك شيرين گفت و گو

او يارينگ الينده تازا دستنبو

عيشوه ‌دن غمزه‌دن نازدان دويماديم

خوش او گون کی نازلی یاری بولوردوم

گاه کوسدوروب گاه گؤینونو آلیردیم

کوسدورنده قول بوینونا سالیردیم

هرنه اؤپدوم قشنگ قیزدن دویمادیم

يئري شورا گول و ريحان بيتيرمز

اصيل زادا اؤز اصليني ايتيرمز

قارين توشا گؤز تاماشا گؤتورمز

هرنه باخديم آلا گؤزدن دويماديم

مأذون دئيه‌ر: سئير ائيله‌ديم چؤللري

سياحت ائيله‌ديم آغير ائللري

باغچالاردا دوردوم قيزيل گوللري

آيايدين، جوانليق، يازدان دويماديم

Bu dunyaya gelib gelenden belli

Saz o sohbet xoş avazdan doymadım

Özümü tanıyıb bilenden belli

Xub yoldaşdan eh_ é razdan doymadım

Xoş o gün ki déberinen ruberu

Oturub éderdig şirin goftogu

O yarıŋ elinde taza destenbu

İşveden ğemzeden nazdan doymadım

Xoş o gün ki nazlı yarı bulurdum

Gah küsdürüb gah göynünü alırdım

Küsdürende qol boynuna salırdım

Herne öpdüm qeşeng qizden doymadım

Yéri şora gül o réyhan bitirmez

Esilzada öz eslini itirmez

Qarın toşa göz tamaşa götümez

Herne baxdım ala gözden doymadım

Me'zun déyer séyr éyledim çöleri

Siyahet éyledim ağır élleri

Bağçalarda dürdüm qizil gülleri

Ayaydın cevanlıq yazdan doymadım

 

 

وئبلاک یازان _ ارسلان میرزایی - چهارشنبه بیست و دوم تیر 1390 ساعت 15:19 موضوع لار | ثابت لینکيم

گچن آيينگ 13و 14 (3و4 مايز) تركيه ارزوم شهري آتاتورك يونيورسيته سينده 3. تورك دونياسينينگ عاشيقلار شؤلني قورولدو.

بو شؤلنده هامي تورك دونياسيندان من جمله توركيه، قزاقستان، آذربايجان، ايران(آذربايجان، شاهسئون، قشقايي، خراسان، توركمن و ....)، گورجستان، چين ( اويغورستان) دان اورا ييغليب و اؤز فرهنگلريندن چالديلارر و چاغيرديلار.

بو آرادا قشقايي لاردا اؤز فرهنگ، موسيقي و شعرلريني تورك دونياسيندا ياخچي تانيشماغا قويدولار.

اوستاد اسدا... مرداني ديلچي ليكده، محسن احمدي تورك ائللري اوستونه آراشديرماچي ليكدا، پروين بهمني ييرچي ليكده، محمد جاويدي موسيقي دا، دامون شش بلوكي موسيقي و ارسلان ميرزايي دا شعر و موسيقي‌ده برنامه لري واريدي.

 

 

وئبلاک یازان _ ارسلان میرزایی - سه شنبه بیست و هفتم اردیبهشت 1390 ساعت 15:38 موضوع لار | ثابت لینکيم

اوشاقلار آي اوشاقلار

قشقايي دا انگ اول كي اوشاق كيتابي

چاپا چاتدي.

شعر: ارسلان ميرزايي

تصوير: سپيده كريمي فرد

تيراژ: 5000 جلد

باها: 800 تومن

انتشارات قشقايي شيراز

اوشاقلار آی اوشاقلار

 

اوشـاقــلار آی اوشـاقـــلار                   

گلينـگ تـا بئل باغــلاياگ

اؤزگه ديلي دؤشونده                                

تـورکـی ديلـی سـاخلاياگ

گنجشکه بيز قـوش دئره‌گ                   

 آشنــايـا تـانیـش دئـره‌گ

ابـره بـولـوت سـؤيله ره‌گ                   

 بـارانـا يــاغیـش دئــره‌گ

 

خـرگـوشه دووشان دئره‌گ                    

مـوشادا سیـچان دئـره‌گ

لاک پشت اولـور تــوسبـاغا                    

بيـز مــارا ايــلان دئــره‌گ

 

اوشــاقـلار آی اوشــاقــلار                    

گلينـگ تـا بيـز سـوروشاگ

آتــامیـــزدان، آنــــــادان                    

تــورکـو ديلــه دانیــشاگ

ســرمايـا ســوووق دئره‌گ                    

 مرغــه ده تـوووق دئره‌گ

تورمـاگ بـاخـاگ ايـراقدان                  

 نزديکـه يــوووق دئــره‌گ

 

ده‌وه دئـده‌گ شتــــــرا                    

سنـگ دئميـره گ کـوتورا

سـؤز دئيه‌ره‌گ اوره‌گدن                   

تا گـوينــونگـه اوتـــــورا

 

مـن اؤزگـه‌يـه جان دئمم                   

آنــامـا مـــامــــان دئمم

بــرف بيـليــرم قـار اولــور                   

هئــچ کيمــه يــالان دئمم

 

هنـــدونه قـارپــیز اولـــور                    

نعنــادا يــارپـــیز اولــــور 

آی هئـــچ زامان ماه اولمـاز                   

ستــــاره اولـــدوز اولـــور

 

بـورمـاغــا انگشـت دئمـــم                   

يـوموروغــا مشـت دئمــــم

اتيم تـؤکـولــور يـولـــداش                   

اتيميـزه گــوشـت دئمــــم

اوشــاقــلار آی اوشــاقــلار                  

گلينـگ گئـــدگ اوينـاياگ

بيـر_ بير اينان جوش يئيگ                   

قـازان تکيــن قــاينـايــاگ 

 

 

 

وئبلاک یازان _ ارسلان میرزایی - چهارشنبه بیست و چهارم فروردین 1390 ساعت 10:37 موضوع لار | ثابت لینکيم

وبسایت انجمن نویسندگان ایل قشقایی راه اندازی شد.

جهت عضو شدن در این وبسایت هر چه سرعتر به این آدرس مراجعه فرمایید:

www.qeyd.org

برای اطلاعات بیشتر با شماره ی 09394228874 تماس حاصل فرمایید.

 

وئبلاک یازان _ ارسلان میرزایی - چهارشنبه یازدهم اسفند 1389 ساعت 8:46 موضوع لار | ثابت لینکيم

بو شعري رحتمليك تيمور گرداني اون دقيقه اؤلوموندن ايلرتر بيزه محبت ائيله دي:

 

ارسلانينگ اوزاق يولو

اوزاق يول دئ ارسلانا اوزاق يول داهي كسيلدي

بيز بير يامان يارايديگ ياراميزا دوز باسيلدي

 

اوزاق يول دئ ارسلانا اوزاق يولدان گلن يوخدور

قشقايي ائلي داغيلدي ائلي يادا سالان يوخدور

 

اوزاق يول دئ ارسلانا يوردوموزدان بايقوش اوچور

سولار يامان سيليكله‌نميش بيزيم قانيميزي ايچير

 

اوزاق يول دئ ارسلانا طنز يازاندا سققل اولماز

طنز يازان جيبي ييرتيق دير ييرتيق جيب كي پولدن دولماز

 

اوزاق يول دئ ارسلانا بيزيم طنزينگ ساغ الي ينگ

طنز يازماگدا هم دولويانگ، چوخ باغيشلا هم دلي ينگ

 

تيمور اوزاق يول چاپيني تبريك دئيه‌ر ارسلانا

شكر كي هدفمند اولدو داها گئدمز اردكانا

 

وئبلاک یازان _ ارسلان میرزایی - چهارشنبه چهارم اسفند 1389 ساعت 18:18 موضوع لار | ثابت لینکيم

اوستاد تيمور گرداني

قشقايينينگ طنز يازان شاعيري كؤچدو:

ياش: 66

اثرلري:

شعر توپلوسو: يارپاق، قره كيشي، فوجوق،

كتاب طنز فارسي: شيرم را حلالت نمي كنم و مدرسه پیرشوک

********************

سن آيريليب بيزدن گئتدينگ            دالينگ سوره ائل آغلادي

گؤيندن گئدمنگ گؤزدن گئتدينگ        هر گؤزوم بير سئل آغلادي

******************

پارادوكس

چه پارادوكس بديع و بعيدي بود

گريه لبخند

و چه آميزش غريبي بود

آميختن حس

چشمها و لبها

آه چه جناس تلخي بود

كوتاهترين جمله بلند

« مرد مرد »

گرچه مرگش زندگي ست و نبود بودنش

صحه اي بر عدم هستيش نيست

ولي او كوچيد:

پدر شعر طنز قشقايي

تيمور گرداني

رفت...

بيز بو غمي و بؤيوگ ماتمي محترم عائله سينه، قشقايي ميللتي و هامي تورك ادبيات و هونر سئونلرينه تسليت دئييرگ.

تيمور گرداني قشقايينينگ بؤيوگ طنز يازان شاعيري جمعه گونو شعر آخشاميندا تربيون داليندا سون كي شعريني (يارانالار هدفمند اولدو) اوخودو و ائله اوردا جان باغيشلادي.

ساليندا كي جمعيت هنوز طنزلرينه گولوردولر كي اؤلومه گينه آغلاديلار.

روحو شاد و يئري جنت اولسون.

 

وئبلاک یازان _ ارسلان میرزایی - دوشنبه بیست و پنجم بهمن 1389 ساعت 8:58 موضوع لار | ثابت لینکيم

بير قشقايي اوشاغينينگ سسيني بوردا ائشيدينگ

آديم: رضا ميرزايي

http://xoxaneserler.mihanblog.com/        

ياشيم: 5

قشقايي يام

 

       

 

وئبلاک یازان _ ارسلان میرزایی - شنبه دوم بهمن 1389 ساعت 22:55 موضوع لار | ثابت لینکيم